Selasa, 14 April 2009

Andung-andung atau Mangandung

“Mangandung”… salah satu ciri khas orang batak (-terutama jaman dulu ??),.. apakah ini perlu dilestarikan ??, awak nggak bisa jawab bah…

* Andung ni ina, ripe ni na mate i

Marsiruntuson ma hape damang rajanami. Hudompu nian jolo martonga ni asean sinuantunasta i di pudian ni damang among rajanami. Holan i nama nian rajanami sidangolon di pudian ni damang; aut na martonga ni asean i dipudianmu amonge, detak marsijagaron do punsu ni siubeonta i. Asa i ma na dangol di ahu amonge. Ai so huparningothon be anggo na dangol i. Ai marsituriak do ahu nian dohot punsu ni siubeonta, ingkon jolo martonga ni asean di pudian ni damang siadopan, asa tangi ma sipareonmu da rajanami, sai unang ma malaon matading ahu di pudianmi, among, ai dolok panangkopi situriak ni sinuantunasta punsu ni siubeonta i, ima na so tarsarihon simangkudaphu didadang ari diullus alogo i…

Andung ni parumaen ni na mate i

Ai barani ma ho hape among na umbalos ahu tumadingkon hami na di pudianmon. Boha ma parsimalolongkononku siadosan punsu ni siubeonmi na so martonga ni asean na di pudianmi. Anggo simangarudok nian among, nunga matua bulung di jolojolomi nunga marsinuantunas ahu dua simardung, ima sisumbaon ni damang na di jolo-jolongki marsinuan beu ahu tolu simardung. Ai aut martonga ni asean siadosan detak so bosar do na dangol di bagasan rohangki.

Ia marobur ma damang na umbalos ahu sursar ma na dangol da amonge di bagas pangarohaingki, bosar ma na hansit i. Ai tarduru siadosan sian sain hami siadosan i, so naggo martonga ni asean simangarudokna i. Aha ma simangarudokhu nunga marsinuan beu ahu tolu simardung, marsinuantunas ahu dua simardung i. I ma na dumangol da amonge siadosan punsu ni siubeonmi nanggo tung martonga ni asean i nian di pudianmi asa marobur damang tu situmalin i. I ma da umbahen golap na tiur huparsimalolongkon umbahen urmun na tiur hutailihon…

Andung ni anak ni na mate i

Huandung ma damang i, damang i amoong, among na marsinuan. Ba, di dia ma damang palilungangku da among, ai palilungangku damang mardalan sirumimpang na malilungi dolok simanabun pinalilunganmi, patambor silumuhut paungan situmalin i. Jadi tading ma au among songon durame di balian i. Boa durame di balian da among boi ulahan i. Ba, di dia ma damang palilungangku da among, nanggo sada siatongkinan, nanggo songon na ambat di pintu, songon na jumpang di hite damang i among na mura lupa on di sinuantunas ni damang dohot sinuan beumi dohot sisumbaon ni damang na di jolo jolongki, among…among…among…among…!!

Ba di dia ma jalahanku damang among, damang nai parsihol i, parsimangkudap na so tupa sumungkari, na mantat gundur pangalumi ansimun pangalambohi i, damang i among !! Damang among, babiat di pintu, gompul di alaman i, dundang soaloon, tanduk so suharon. Lili so sumogir, banebane so sumungkar i, hupalilungkon parsimangkudap ni damang tu simangarudokki.

Jadi digotap ma among songon baion sijalinon i na halonglongan damang au amongoi da sian jolo-jolongki. Jadi malilung ma among harurusan aek silumanlan na songon batu mangulang songon aek mabaor i da sian simalolongki. Among..!! na so tabahen holong oi ! Ba dia ma hatahonongku da among, na haroburan damang i. Ai aut na malo manjomputi ahu nian na songon na seang i na malo mamutihi songon na abur i, putihangku ma i nian sidangolon dibagas siubeongki, na magodang panaguhan among; jadi na so margogo do ahu da among humatahon na hansit i, na haroburan damang on tian jolojolongki. Damang among na lambok malilung i among; ba didia ma damang palilunganku da among ..!!

Andung ni hela ni na mate i

Amonge among na sumuan au, dia dibahen marsiruntuson damang among tumadingkon hami na dipudianmon. Boha ma pamutihikku among disituriakmu ditangihon sipareonki; mandabu siajaron ho nian among ditangihon sipareokku; banebane so sumugor i; lili so sumungkar i, i ma na so haputihan ahu da among, ai so adong be mambahen siajaron tu ahu lapalapa i. Ai undoton ma hami hape among, ai nunga marobur damang among; songon solu na buruk ma hami hape among siundoton i, i ma umbahen songon aek mabaor da among siulubalang aek tian simalolonghi. Matompas pe silumatahut sian hita among, ndang adong diandung simanghudaphu, holan pinaribot do i diandung simangkudaphu na so marsinuantunas di tonga ni aseanna i, umbahen so adong among donganku marsituriak na haroburan damang di partaonan parsumalin i. Asa tangi ma sipareonmu da among na tumangihon rindangmu rahar di banua on. Ai tarduru amonge rindangmu simangarudokhi songon handang balian i na di duru ni bale dibalian ni parik i, ai malu so dohot ma pinaribot so marsinuantunas di jolojolona i, asa boa ma pangandungku amonge, among na sumuan ahu, na tangis so marrindang di simangarudokki…

Andung ni boru ni na mate i

Among marsiruntuson ma ho hape among tumadingkon hami. Ba ise be donganku marsituriak among di sian ni agalangon on; matua bulung pe ho nian among, tangkas marsituriak do ahu marpaiogon di sian ni agalangon on. Hubolushon do ahu nian among na so marsinuantunas dijolo-jolongki, boha ma pinaribot da among na so marsinuantunas bona ni siubeonmi. Marsitingkiran hami among songon holbung i, marsitatapan hami songon dolok-dolok i dohot pinaribot bona ni siubeonmi, tarduru hami among songon handang balian i. Sai unang ma au malaun matading, unang huparningothon i, hami dohot pinaribot bona ni siubeonmi, mahansithu mangapian amonge di dadang ari diullus alogo i…

Tidak ada komentar: