Mangadopi Horja Pamoruon Gultom

Di ari 29-05-2023 ro do marga Gultom sian luat (Desa) Batunadua Kec. Pangaribuan manopot hami pomparan ni Op. Tiurna Sormin tu luat Pagaran Dolok Desa Lumban Sormin Kec. Pangaribuan, patolhashon gokhon dohot jou jou nanaeng patupaon nasida ulaon horja, ima manghorjahon ompu nasida namargoar Op. Nangkali Alam Gultom (Gr. Niondingan) dohot anakhonna, dohot pahoppuna.

Ia hami na manjanghon sian pomparan ni Op. Tiurna Sormin, ima 

(1) pomparan ni Op. Ferry Sormin

(1.1) pomparan ni Op. Sondang Sormin

(1.1.1) G. Sormin/br. Hutauruk (Op. Hana)

(1.1.2) F. Sormin/br. Harianja (A. Mahendra)

(2) pomparan ni Op. Lomuk Sormin 

(2.1) K. Sormin/br. Panjaitan (A. Lomuk )

jala dohot diadopi haha anggi na di luat Pagaran Dolok ima pomp. Op. Mangala Sormindohot pomp. ni  Op. Paima Sormin,  pomp. ni Op. Sairu Sormin dohot pomp. ni Op. Rj. Ugan Sormin.

Parboaboaan ni pamoruan marga Gultom, ima : "pahoppu ni Op. Nangkali Alam Gultom (Gr. Niondingan) siminik ni Op. Gumara Gultom/br. Tambunan na margoar Op. Sumurung Gultom/br. Ritonga/br, Sormin dohot do horjahonon nasida di ari 6-8 Juli 2023 jala ulon i dipatupa di alaman nasida di luat Batunadua".

Mangadopi gokhon dohot jou jou ni pamoruon on, di ari Rabu 5 Juli 2023 tinopot ma pamoruon Gultom tu luat nasida, patupa ulaon "pangupaon" ma ,arlapatan ma i asa anggiat ulaon horja nanaeng dipatupa uli partupana jala saluhut pamoruon Gultom na marhorja dibagasan hahipason mangulahonsa.

Di ari Jumat 7 Juli 2023 ni adopan do ulaon horja on, ima marhite panortoron mi suhut ni Op Sumurung ima Ritonga sian Aek Tangga Garoga dohot Sormin sian Pagaran Dolok Lumban Sormin Pangaribuan.  Diulaon panortoron on pinatupa do ULOS na hombar, ulos tohonan opat bulung, ima sian Suhut Sormin (1 bulung Ragiidup), sian Bara Sormin (1 bulung Ragi Hotang ), sian Tulang Siburian (1 bulung Ragi Hotang), sian Pariban Panjaitan dohot Napitupulu (1 bulung Ragi Hotang) dohot Ringgit .

Ihut di ari Jumat 7 Juli 2023 on manortor do suhut ni parhara di ulaon horja on. Ia na digoari parhara di ulaon on ima ianakhon ni sundut pahoppu na dihorjahon.  Ia siminik ni Op. Sumurung Gultom/br. Sormin ima Op. Hottua Gultom/br. Sormin, marhitehon siminikna ima lae dohot ibotonami, suhutna ima Op. Ferry Sormin.  Diulaon panortoron on pinatupa do ulos tohonan opat bulung, ima sian Suhut Sormin (1 bulung Ragiidup), sian Bara A. Lomuk Sormin (1 bulung Ragi Hotang ), sian Tulang Gultom (1 bulung Ragi Hotang), sian Pariban (1 bulung Ragi Hotang) dohot Ringgit .

Di ari Sabtu 8 Juli 2024, ari parpudi diulaon horja on, rimpu do sude Hulahula laho mangolophon dohot manghorashon naung sikkop ulaon i.