Mandulo Hinambor

Homban

Sabtu 07 Oktober 2023, ni haringhothon do mangalangka tu luat Habinsaran, tipakma i tu huta Sibalanga di Kecamatan Garoga Kab. Tapanuli Utara.

Narobi, ia luat Habinsaran manang Garoga ima na gabe luat parjolo sahali diingani angka ompu i pomparan ni Raja Siregar, dunghon ditadinghon luat Lobu Siregar, na opat ompu, ima pomparan ni Silo, Dongoran, Silali dohot Sia(ng)gian.  Sian luat Habinsaran on ma muse mangarerak tu luat na uwalu, mangalului jampalan na um lomak.

Di angka torsa na ni torsahon ni akka ompu si jolo jolo tubu sahat ro di damang nami, dihatindanghon do, ia ompu nami hea do maringan jala manoto di luat Sibalanga jala di si di sada rura adong do na gabe "homban manang parmualan manang parpangiran" (38WC+P3H, Sibalanga, Kec. Garoga, Kabupaten Tapanuli Utara, Sumatera Utara 22473) dinasida, jala takkas do i iboto akka na tading di luat i sahat ro di tingki on.

Hinambor

Dang sadia dao sian parhombanan i, maniamun, adong ma inganan na gabe panuanan (hinambor)  ni naung jomolo sian ompu i, ima ompu i na hot di huta i ro di ujung ni ngoluna, dang dohot be bukkas sian luat i tu tano Lumban Sormin.

Dunghon tubu sangkap di roha nang ate ate, martahi, udur ma mengalakka tu luat Sibalanga, i ma hami Op. Hana Sormin/br. Hutauruk rap dohot siminik Steven Sormin, sarurut nami Ama Mahendra Sormin/br. Harianja dohot siminikna Mahendra Sormin, dohot anggi doli (naposo dope) Pardomuan Sormin.

Pangulaon di pardalanan on, parjolo ma mandulo homban ni ompu i huhut ma martapian di si.  Dung sikkop sian homban i meret ma muse tu hinambor ni ompu i.  Ia di inganan tipak hinamboor i, adong do muse hinambor ni ompu sian tarombo ni hahaanggi, i ma hinambor ni Ompu Dorma Raja Sormin (nunga dipauli/renovasi di taon 2019 naung salpu).  Dunghon tipak di inganan i ni duhutan ma hinambor i asa um ias idaon.  Hinambor on nunga adong parjolo na paulihon sian pomparanna, ia pe dang haru hattus do pe songon habonggalon ni goar ni ompu i.

Songon hasomalan ni parngoluon, pinatupa do partangiangan na metmet di hinambor i, mangido tu Debata, manghirim di nauli tu akka ari mangihut nang tu angka pomparan sogot, tupa basa basaNA.

Tiur do pardalanan sahat tu mulak tu bagas nami be.

"Horas ma na ro, Horas ma na tinopot, Horas ma na muli jala Horas ma na tading"