Rabu, 14 Februari 2018

Tona ni Simatoras

Di ari Minggu 26 Desember 2016, marpungu do hami dibagas ni simatorasnami R. H.  Sormin/R. Br. Pakpahan di huta Pagaran Dolok,  Desa Lumban Sormin,  Kecamatan Pangaribuan,  Kabupaten Tapanuli Utara,  Provinsi Sumatera Utara, rap martangiang tipak ari rea natal.


Ia hami siminik ni simatorasnami 4 baowa jala 3 boru. Ia baowa on ma:  Siahaan ima Ferry Sormin, SH,  MH oroanna Dra. Yuniar Rajagukguk (Op. Ias); sipaidua Giotto Sormin,  SE oroanna Susi Radotma Hutauruk,  SE (Ama Surya); sipaitolu Rudy Riando Sormin, SE (Ama Cindy),  oroanna Delta Jelita Aritonang,  sipaiopat jala siampudan Frans Totha Patrisius Sormin oroanna Henny Lamtaida Harianja (Ama Mahendra).  Ia boru on ma : Emelia Sormin namarhamulian tu laenami Luhut Manalu sian Aekraja (ndang boi ro nasida ala dibagasan parsahiton); Yasintha Sormin S.Th marhamulian tu laenami Lohot Lingga sian Sumbul (ndang boi ro nasida siala tipak marulaon nasida tu Sumbul),  Agnes Lasma L. T.  Sormin, SH na marhamulian tu laenami Haposan Siahaan sian Langsa).

Ia Ama Cindy nunga leleng ndang mulak tu bonapasogit, tarlumobi ma i dunghon sorang siminik bawa dinasida, ima Devdan.  Dirajumi rohanasida asa ikkon boi ma Devdan pajumpang tu ompungna di bonapasogit andorang boi do pe ditanda dibagasan hahipason.

Di ari Minggu, 26 Desember 2016 martahi do hami patupa sipanganon natabo tu simatorasnami, marala ma i "bissan boi do pe dipangan nasida sipanganon i", jala laos hutogihon hami ma amangudanami Kamso Sormin/br Panjaitan (Ama Lomuk) di ulaon i.

Di na marsipanganon i, ia pe otik na ma boi dipangan sipanganon i, tung las do roha ni simatorasnami manganhonsa.  Jala dibagasan las ni roha do hami na pungu di ombas i.

Dunghon singkop hami marsipanganon, marsirarion ma hami sama hami taringot parngoluon tikkion, di panggulmiton ni ngolu.  Ihut di patolhas simatorasnami ma tu hami songon partording ni parartaon nasida najinalona sian simatorasna ihut na pinukka nasida.

I tikki na marsirarion i, ro do akkang boru nami Nai Pesta Sormin sian huta tonga Lumban Sormin, ditariashon nasida, nunga songon na sihol rohanasida pajumpang tu simmatorasnami.

Diuduti simatorasnami do panghataion nasida, laos ditariashon ma nagabe tona tu hami ganup siminikna baowa dohot boru, dohot pomparanna.  Songon on ma partording ni tona i :

Ia porlak bagasan na di duru ni huta, dibagi lima ma i, opat ma i ganup tu siminik baowa, sada ma i na gabe inganan manang hinambor.  Jala nitahi ma i dos parbolakna jala di tonga ma inganan i dipatupa haduan;
Ia pargadongan na didalan tu Simaninggir dibagi opat unjur ma i manatap tu parhaumaan manang tu Lamsinok,  "panjaean" ma i tu siminik baowa na opat.  Ni tahi do i mambahen bagas na metmet sogot haduan.  Jala pargadongan na di jae na i dipasahat ma i tu siampudan (Ama Mahendra) naginoaran ma i "panjaean".
Ia pargadongan nadeba, tolu turpuk ma i dipasahat ma i "panjaean".tu baowa siahaan, sipaidua dohot sipaitolu
Ia tombak parhaminjonan na marbalok tu parhaminjonan ni amanguda Kamso Sormin (Ama Lomuk) dipasahat ma i "panjaean" tu siampudan (Ama Mahendra).  Ia tombak parhaminjonan nadebanai, naung tinobus ni Ompu Ias, na marlapatan do i gabe ampuna ni Ompju Ias.  Takkas dihatahon jala ojak pandohan i, ia tombak i dipasahat Ompu Ias do i ulaon ni Ama Mahendra.
Ia akka hauma, songon on ma digorga simatorasnami:
Panjaean tu anak baowa siahaan (Ompu Ias) ima hauma na di Lamsinok, huhut laos dipatota simatoasnami do tona ni ompung uju dingoluna, ima hauma tu pahoppu panggoaran ni ompung na di Lamsinok.  Laos dipatota simatorasnami do muse panggorgaon tu pahompuna ima si Sondang (boru) na dipasahat tu anak baowa siahaan ni Ompu Ias, ima hauma di Lamsinok.
Panjaean tu anak baowa sipaidua (Ama Surya) digorga ima hauma na di toru dalan Simaniggir na digoari hauma gambo.
Panjaean tu anak baowa sipaitolu (Ama Cindy) digorga ima hauma na di toru dalan Simaniggir;
Panjaean tu anak baowa sipaiopat (Ama Mahendra) digorga ima hauma dohot duruna na di Siriaria;

Ia tu boruna na tolu takkas do dihatahon simatorasnami, hauma na di Sunge sunge, sada batangi ganup tu boru natolu.  Di Sunge sunge do hauma ni namboru Ompu Hottua Gultom na di Rantau Prapat na niampehon/pinasahat ni simatorasnasida manang ompung nami Ompu Batu.

Tidak ada komentar: