Rabu, 14 Februari 2018

Manatap tu Haulion Ro

Bakko do i, olo do tompu dibagasan akka panghation tubu akka tahi di akka na martinodohon, na sarurut, laho mangulahon sada-sada ulaon.

Marbonsir ma i i tikki ari rea Natal 26 Desember 2016 naung salpu, i tikki i tubu do panghataion na gabe tahi di Ompu Ias (Ferry Sormin/Juniar Rajagukguk) dohot Ompu Noel di huta Pagaran Dolok taringot dolok inganan ni tambak ni ompu i Raja MarHuRaja dohot pomparanna, ditagam sura-sura so tung russur dolok i tu alaman siala naung bahat ditolbahi akka dongan. Pola do ditahi nasida asa marsada roha pomparan ni ompu i laho paulihon dolok i, asa uli inganan i jala laos uli idaon.

Manguduti panghataion i marpungu do pomparan ni ompu i ni uluhon ni Ompu Noel di huta Pagaran Dolok di ari naung salpu di bulan Januari 2017, dipatolhas panghataion i, jala uli roha ni pomparan ni ompu i mangulahonsa.  Udut tu si, di ari 21 Januari 2017 ro do Ompu Ias mandapothon pomparan ni ompu i sian Pematang Siantar laho pahantusson partahian i.  Diondolhon ma di purrungguan i asa sude ma pomparan ni ompu i masilehon guguna be.  Jala andap do partahian i mangolophonsa.

Di ari Sabtu 28 Januari 2017, takkas ma attong pomparan ni ompu i di partahian i, di manogot na di ari i nunga marpungu be sude pomparan ni ompu i di bagas ni amanguda Ama Lomuk (Kamso Sormin), akka Ama, Ina, dohot akka siminikna be marhata horas dohot marhata gabe huhut sisada tangiang mangido pangurupion dohot pasu-pasu sian Debata Mulajadi, asa partahian i dipatulus ihut manghorhon haulion di ganup pomparan ni ompu i.

Dunghon simpul martangiang, borhat ma sude pomparan ni ompu i mandapothon dolok i, dungi sibuat ulaonna be ma natorop i mangihuthon gogona be.

Dunghon hos ari, lao guling ari, ro ma marsipanganon, sahat ma muse Ompu Ias dohot parsondukna sian luat Pematang Siantar tumopot natorop i, laos udur ma muse nasida mangulahonsa, paulihon tembok ni dolok i.

Tidak ada komentar: