Jujur Ngolu Emelia Sormin

JUJUR NGOLU NI INANAMI

E.Br Sormin (Op. Ni si Efraim )

Sattabi godang ma diloloan nahuparsangapi hami, dihamu amang raja inang soripada, tarlumobima disude rajani Hula-hulanami, ro di sude na ro mangkaholongi hami. Saonari jahahonon nami ma jujur ngolu ni inanami naung jumolo dialap Tuhanta.

Ia Inanami on sorang ma ibana 31 Mei 1962 di Pematang Siantar, boru ni ompung nami bao Op. Sondang Sormin tubuni oppung boru nami Op. Sondang boru pakpahan sian Lumban Sormin, Pangaribuan.

Marhamulian ma Inanamion tu amanami naung mangkabaluhon Inanamion 30 Juli 1985 jala marhagabeon ma Inanami on 2 baoa, 2 boru:

1.    Boru siakkangan margoar Elvriyanti Sarmaika Magdalena Manalu, marhamulian tu anakni amangboru nami marga Sinaga sian Tinjoan (Kisaran), jala nungga dibasabasahon tu nasida sada baoa.

2.    Boru sipaidua margoar Anggreini Chandra Kartika Manalu, marhamulian tu anakni amangboru nami marga Sileban, jala nungga dibasabasahon tu nasida 1 baoa, 1 boru

3.    Anak Sipaitolu Gilbert Manalu (ahu ma i). Dang marhasohotan dope.

4.    Anak Sipaiopat Yogy Manalu ima anak siappudan ni Inanamion, dang marhasohotan dope.

Jadi pungu ma sude pinompar ni inanami on 2 anak, 2 boru, 2 hela, 3 pahompu. Jala pungu ma 9 halak.

Ia Inanami on di tingki parngoluonna mangula di Pamaretta do, jala inganan pangulaonna on ma :

1.    Guru. Parjolo sahali mangajar ma di SMP Katolik  Tarutung/ Aekraja,

2.    Guru SMP N 1 Arse Tapanuli Selatan,

3.    Guru SMP N 2 Tarutung.

Ditaon 2012 toppu songgop parniaean tu dainang on, 8 taon ma dibagasan parsahitan. alai ido haroa nadumenggan dingoluna, na diari jumat pukul 07.00 manogot marujung ngolu,  dialap tu ampuan niTuhan i sian tonga-tonga nami, sian tonga-tongata.

Amang raja inang soripada, hurajumi hami do na massai mauas dope hami diangka ragam ni pasu-pasu i, laos ima nahupangido hami tu hamu saluhutna asa anggiat dipudian ni Inanamion dipasahat Tuhan i tu hami, asa tubuan anak nasotubuan anak, tubuan boru nasotubuan boru, dapotan rokkap naso dapotan rokkap. Tarlumobi di Amanami dilehon benget ni roha laho mangaradoti hami sude pinomparna. Aut tung adong angka hahurangan ni Inanamion tingki dingoluna asa salphon hamu sian bagasan rohamu, asa tulus ibana manopot Tuhanta. Molo tung adong dabu-dabuan ni inanamion tingki di ngoluna na soapala huboto hami rade do hami paturehon. Songoni ma jolo naboi tarpatupa hami jujur ngolu ni inanami.

Mauliate